جواب ان غزل

شیرولی خان اسیر فیضیؔ صاحب کا کالم ” دوبارہ غلطی کی گنجائیش نہیں” سابق صدر جنرل پرویز مشرف(ر)  کے چاہنے والوں اور اے پی ایم ایل کے کارکنوں کو اچھا نہیں لگا ہے۔ لگنا بھی نہیں چاہیے کیونکہ ہر پارٹی کے اندر جیالے، متوالے پروانے اور دیوانے ہوتے ہیں جن کو اپنی پارٹی یا اس کے لیڈر کے ساتھ جذباتی لگاؤ ہوتا ہے۔ ان کو اپنے سیاسی گرو کی بڑی سے بڑی غطی نظر نہیں آتی جیسا کہ پی پی پی اور پی ایم ایل نون والوں کو نظر نہیں آتی ہے اوراس وجہ سے پارٹی کے خلاف زبان کھولنے والوں کی زبانیں کاٹنے کو دوڑتے ہیں۔ اس قسم کے پروانے اور دیوانے جنرل پرویزمشرف کے بھی ہیں جو پاکستان کے طول وعرض میں خاص کرکے چترال میں بڑی تعداد میں  موجود ہیں جس کا مظاہرہ انہوں نے 2002، 2008 اور 2013 کے جنرل الیکشنز اور 2015  کے بلدیاتی انتخابات میں برسر اقتتدار اور بڑی پارٹیوں کے خلاف الیکشن لڑکر دکھایا ہے۔ یہ کارکن خالص ہیں۔ ایماندار ہیں۔ وفادار ہیں اور سب سے بڑھ کر یہ کہ سچے مسلمان ہیں جو کسی کا احسان مرتے دم تک نہیں بھولتے۔ چترال والوں نے اس مسلمانی کا مظاہرہ گزشتہ چار دھایوں سے بٹھو کی پی پی پی کو ووٹ دے کر کرتے رہے ہیں۔ یہ لوگ چڑھتے سورج کے پجاری اور ابن الوقت نہیں ہیں۔ بہت ہی نڈر اور جمہوری مزاج کے لوگ ہیں۔ انہوں کبھی بھی برسر اقتتدار یا بظاہر طاقتور پارٹی کی کبھی پرواہ نہیں کی۔ چترال والے عزت دار لوگ ہیں اور عزت کے  بھوکے بھی ہیں۔ ہمارے “جمہوری مزاج” چترالیوں کو پرویز سے اس بات کی پرخاش ہے کہ بقول ان کےاس نے مارشل لا لگایا اور آئین توڑا تھا جب کہ اس وقت کی سپریم کورٹ نے اسے ” نظریہ ضرورت” کے تحت جائز قرار دیا تھا۔ اگر سپریم کورٹ اسے جائز قرار نہ بھی دیتی تومیرا نظریہ اس کے بالکل برعکس تھا اور ہے۔ میرا سوال ہے کہ میں بحیثیت پاکستانی شہری اسی آئین کے اندر موجود اپنے حقوق سے ساٹھ سالوں تک کیوں محروم رہا؟ آئین پاکستان کے مطابق چترال والوں کو بھی لاہور، اسلام آباد، کراچی اور دوسرے شہروں کی عوام جتنی ترقی کرنی تھی اور میرے جیسےلاکھوں چترالی بزرگوں،بہن بھائیوں اور بچوں کو جو بنیادی شہری حقوق حاصل تھے اور ہیں وہ ہمیں کیوں نہ ملے؟ کیا ہمیں اپنے آئینی بنیادی شہری حقوق سے محروم رکھنے والے جمہوری حکومتوں اور وزرائے اعظم نے آئین کو پامال نہیں کیا؟ اگر اس آئین میں ملک کے پسماندہ عوام کے حقوق کو تحفظ حاصل نہیں ہے تو میری نظر میں اس کے توڑنے والے بھی گنہگار نہیں ہوسکتے۔ جو آئین  کمزور کی حفاظت اورظالم کو باز نہیں رکھ سکتا تو وہ اتنا مقدس کیسے ہوا کہ اس کو معطل کرنے والا غدار کہلائے؟ میری سمجھ میں یہ بات بھی نہیں آرہی ہے کہ ہماری عدالت عالیہ نے نواز شریف کو عمر قید کی سزا سنائی تھی۔ پرویز مشرف صاحب نے انہیں معاف کیا اور جلاوطن کیا۔ پھر اسی عدالت نے آٹھ نو سال بعد انہیں بری کردیا۔ کیوں؟ ہم کس کو غلط کس کو درست سمجھیں؟ اس کا واضح مطلب یہ ہے کہ ملک کا سارا نظام عدلیہ سمیت حسب اقتتدار کے ماتحت چلتا رہا ہے۔ ہماری معزز عدلیہ کی تاریخ ذرا پڑھ لیجیے۔ پاکستان کی تاریخ میں ایک سابق وزیراعظم ذولفقار علی بٹھوؔ تھے جنہوں نے چترال والوں کو پاکستانی سمجھا تھا اور ان کے دکھ درد میں شریک رہا تھا۔ ان کے بعد سابق صدر جنرل پرویز مشرف (ر) وہ حکمران ہیں جس نے چترال سمیت تمام نظرانداز عوام کے ساتھ سچی محبت کا مظاہرہ کرکے ان کی محرومیوں کا ازالہ کیا۔ چترال کے لوگ انہیں نہیں بھول سکتے۔ میں مانتا ہوں کہ ہم نے اس طرح کی غیرت، وفا شعاری اور احسانمندی کی بہت بڑی قیمت ادا کی ہے۔ مشرف کے دور میں لواری سرنگ 5 سال کے عرصے میں کھل گیا تھا۔ اس کےبعد سے لے کر آج 9 سال گزرگئے اس کی تکمیل نہ ہوسکی۔ اس کا بجٹ جنوبی پنجاب منتقل ہوا۔ ان نو سالوں کے دوران سردیوں میں لواری ٹنل پر چترال کے باشندوں کے ساتھ جو سلوک روا رکھا گیا ہے وہ تو آپ نے بھی آپنی آنکھوں سے دیکھا ہے اور میں نے بھی۔ کاش پرویز مشرف مغرب کے شیطانوں کے دباؤ میں آکراین آر او کے ذریعے بدمعاشوں کو کھلی چھٹی نہ دیتے، انتخابات کراکے ان کو کھل کھیلنے سے روکتے تو  آج سی پیک والی شاہراہ بھی تیار ہوکر چترال میں سے گزر چکی ہوتی۔ ٹنل اور چترال چکدرہ ہائی وے بھی بہت پہلے تیار ہوۓ ہوتے۔ نہ آج ہمیں آئی ایم ایف کے قرضوں تلے دبے مرنے کا موقع دیکھنا پڑتا ، نہ ہماری دولت باہر چلی جاتی اور نہ پانامہ لیکس کی روسوائی دیکھنا پڑتی۔  ہمارے ساتھ سوتیلی ماں کا سلوک تو پاکستان بننے کے ایک  سال کے اندر شروع ہوا  جو جنرل پرویز مشرف کے “ڈکٹیٹرشپ” کے آغاز تک جاری رہا اور پھر ان کے اقتتدار کے بعد کے “جمہوری” دورسے پھر شروع کر ہنوز جاری ہے۔ کیا آپ یہ کہنا چاہتے ہیں کہ چترالی بھی دو روپوں کے لیے اپنی وفاداریاں بیچدیں چاہے ان کی عزت رہے یا نہ رہے؟  اورکرپٹ حکومتوں کا حصہ بن کر بندر بانٹ میں شریک ہوجائیں؟ فیضی صاحب نے اپنے کالم کا غلط عنوان چن کر چترالیوں کی وفاداری کا مزاق اڑایا ہے۔ تجزیہ کرنا ان کا حق ہے لیکن ہم لوگوں کے سابقہ انتخابی فیصلوں کو “غلطی” قرار دینے کا حق ہم نے ان کو نہیں دیا ہے۔ “کھوسہ جولو شلوغ”کے مکار جلاہے اور بے وقوف بادشاہ اور ان کے بدھو درباریوں کی کہانی کو چترال کے بیدار مغز اور عقلمند لوگوں اور ان کے لیڈر کی ذات کے سے منطبق کرنے کی کوشش بھی ہماری بہت بڑی توہین ہے۔ ایک مقبول استاد لکھاری کی نوک قلم سے اس قسم کی تحریر کی تخلیق کی توقع نہیں کی جاسکتی۔ اگران کا مقصد اپنی تحریر کے ذریعے ہماری سیاسی رہنمائی ہے تو اس کے لیے موزون موضوع اور الفاظ ان کو مل سکتے تھے۔ ڈاکٹر موصوف سے انتہائی معذرت کے ساتھ اپنے شک کا اظہار کرنا چاہوں گا۔ “میرے پیارے بھائی اور دوست!آپ کی ڑاسپریکن غیرت کو کس کی’نظر’ لگی؟ کیا کوئی پیر مرشد کے پاس اس کا توڑ نہیں ہے؟”]]>