اپر چترال ضلعی پولیس کے نئے سربراہ ضیاء حسن اور ڈپٹی کمشنر چترال اپر محمد عمران خان نے اسماعیلی ریجنل کونسل چترال اپر کا دورہ کیا، جہاں پریزیڈنٹ اسماعیلی ریجنل کونسل امتیاز عالم اور کونسل کے دیگر عہدیداران نے ان کا خیرمقدم کیا۔
دورے کے دوران (AKDN) کے زیرِ انتظام مختلف فلاحی اداروں اور منصوبوں کے بارے میں ضلعی پولیس سربراہ کو تفصیلی بریفنگ دی گئی۔
بریفنگ میں بالخصوص ضلع چترال اپر میں تعلیم، صحت، مختلف ہائیڈرو پاور منصوبوں اور دیگر سماجی و فلاحی سرگرمیوں پر بھی روشنی ڈالی گئی۔ قدرتی آفات اور ہنگامی حالات کے دوران امدادی سرگرمیوں اور ریلیف سامان کی دستیابی پر تفصیلی تبادلۂ خیال کیا گیا۔
اس کے علاوہ ضلع چترال میں کمیونٹیز کے درمیان مثالی امن، ہم آہنگی اور اتحاد کو مزید مضبوط بنانے کے حوالے سے بھی گفتگو ہوئی۔
ضلعی پولیس سربراہ ضیاء حسن نے اس موقع پر AKDN کی سماجی و فلاحی خدمات کو سراہتے ہوئے اس عزم کا اظہار کیا کہ ضلعی پولیس عوام کے جان و مال کے تحفظ، امن و امان کے قیام اور تمام اداروں کے ساتھ باہمی تعاون کو مزید فروغ دینے کے لیے اپنی ذمہ داریاں بھرپور انداز میں انجام دیتی رہے گی۔